مراحل الحياه العاطفيه عند الرجل و المرأه " الجزء الأول "

مراحل الحياه العاطفيه عند الرجل و المرأه ..

كل واحد فينا بيحس أن الي شافه في حياته العاطفيه و التجارب اللي مر بيها
مأساه وما عدتش علي حد تاني قبل كده . لكن بالرغم من أختلاف شخصيتنا
و تجاربنا و أختلاف االأشخاص الي بنتعامل معاهم إلا اني لاحظت إن في
مراحل بيمر بيها رجاله و ستات بتأثر في علافتنا و اخيارنا للطرف الأخر ..

نبدا بالمرأه :

أول مرحله .. التضحيه و التغيير :
و دي عامة بتبدأ و هيه صغيره شويه أول لما تفهم يعني إيه علاقه و انها
ممكن تحب بس بتبقه خبرتها قليله و لسه مش قادره تحكم صح .
الي بيحصل أن واحد إبن حلال كده بيفهم طبعا إن ديه غلبانه و لسه ورده
مش فاهمه حاجه و يعمل عليها دور الحبيب . و الي حواليها بيبقوا شايفينه
علي حقيقته و بيحاولوا ينصحوها لكن مفيش فايده مع إنها شايفه إنه بايظ
لكن مقتنعه إن هي اللي هتغيره و تخليه بني أدم أحسن , و هتضحي قدام الكل علشان خاطره .
طبعا المرحله دي بتتوقف علي مدي غباء البنت و قد إيه هوه عارف يضحك علي عقلها . لكن المرحله دي بتنتهي بإن هي الحمد لله بتفوق و بتفهم
إن كلام أصحابها كان صح , و بتطلع من المرحله دي كرامتها وجعاها و حاسه
إنها محتاجه حاجه تنسيها القصه دي و الي بيؤدي الي المرحله التانيه .

المرحله التانيه .. التهييس :
بتدخل في المرحله دي و هيه عايزه ترجع قتها بنفسها و تحسس نفسها إنها
ممكن تتحب بجد , اللي عادة بيحصل إنها بتختار واحد مش عاجبها أصلا و في
الاغلب أول و احد في المرحله دي بيبقي أبعد ما يكون في الشكل و الشخصيه
عن الشخص الي حبته وقت المرحله الاولي المرحله دي مش شرط يبقي
فيها شخص واحد بس دي بتختلف علي حسب البنت و الناس اللي عدو
عليها . في المرحله دي و لو حد عاجبها و حست إنه فعلا بيحبها مش بس
بيضيع وقته الي بيحصل بقه حاجه من اتنين في بنات بتنبسط أوي من
المرحله دي و بتقعد تغير كل شويه واحد لحد متلاقي واحد كويس . او بتقرر
إنها او بتقرر انها مش هتصاحب او هتدخل في أي علاقه لحد متلاقي حد بجد
و في الحالتين بتوصل للمرحله التالته .

المرحله التلته .. أخيرا لقيته !! :
ده بقي حلم بنات كتير ( إذا مكنش كل البنات ) إنها اخيرا تلاقي واحد تحبه و يحبها و يبقي قد المسؤليه و مستعد يتجوز .. إلخ , كتير في الاخر بينتهوا مع
واحد غير فتي الاحلام الي كان في خيالهم , و فيه الفئه المحظوظه الي
عرفت تلاقي نفسها فيه , و لكن المرحله دي مش دايما نهايتها بتكون سعيده .
ما هو معروف جدا قد ايه خطوبات بتبوظ و جوازات بتتفشكل . و لما لقدر الله
حاجه من ديه بتحصل من الطبيعي إنها ترجع تاني للمرحله التانيه , و لو هي
شديده الغباء و ما أتعلمتش حاجه من تجارب السنين الي فاتت دي كلها
ممكن تقع في التضحيه و التغيير تاني !!

ثانيا الرجل :

المرحله الأول ... التهييس :

بيختلفوا مع البنات في إنهم بيبتدوا بالتهييس , يصاحب و يسيب علشان يثبت
لنفسه إنه واحد جامد و مفيش حاجه ما جربهاش و الحجات دي . و بيبقي فيه
منافسه بين الشباب في المرحله دي حتي لو مكنش علنا و لكن هي موجوده
ز و كل واحد بيحاول انه يكسب المنافسه دي من غير ما يبان إنه بيحاول
أصلا ! قال يعني العادي بتاعه . بس المرحله دي بتبقي لحد ميحصل !!
تجيله واحده شاطره تعرف تجيب رجله بجد و فعلا ممكن يحبها ولو دي أول
مره يحب و هوه لسه صغير لسه في في أوائل ال 20 كده هيدخل في
المرحله التانيه .
المرحله التانيه .. أنا مش جاهز :

المرحله دي بقه بتحصل لما الواحد يلاقي نفسه بيحب اللي معاه بجد و الموضوع ممكن يمشي و يقلب بجواز و فوبيا الأرتباط تظهر ! هوه بيحبها بس فكره إنه خلاص هيتخلي عن حياته الsingle و يبقي معاها للأبد دي مسببه له رعب , و لكن هو ممكن فعلا يكون مش جاهز علي الأقل نفسيا , يبقه حاسس إنه لسه عايز يسافر يعمل ماجيستير أو يجرب يشتغل بره او عايز يصيع مع أصحابه و ينبسط ! مليون حاجه هو شايف إنه هيتخله عنها لو فكر إنه يرتبط في الفتر دي , فبيقرر إنه يسيبها ... و في الغالب بيرجع للمرحله الأولي !

المرحله الثالثه .. هاتنيل وأهمد :

خلاص سافر و عمل ماجيستير , صاع و ضاع مع أصحابه . صاحب 350 بنت نصهم مش فاكر أساميهم ووصل لمركز كويس في شغله .. فاضل ايه ؟؟
ممكن يفكر بقي في إ،ه يرتبط في الأغلب شخصيه عملت كل ده مش هيرضي بجواز الصالونات و اللي عادة بيحصل إنه بيبتدي يصاحب بنات و في نيته إن لو الموضوع مشي كويس يبقي يتجوز ( ملحوظه : النيه دي ما كانتش موجوده قبل كده ) و لما يلاقي واحده حاسس إنها تنفعه في المرحله دي هيبقي جاهز إنه يرتبط علي الاقل أكتر بكتير من إستعداده و هو في المرحله التانيه !